Վերջ գտաւ Ֆրանչիսկոս Պապին միջազգային առաքելական 7-րդ ճամբորդութիւնը` Սրի Լանքա եւ Ֆիլիփինեան կղզեխումբ։

(Ռատիօ Վատիկան) Կիրակի` 18 յունուարի յետմիջօրէի ժամը 15,30-ին (Հռոմի ժամով 8,30-ին) Մանիլայի ''Անել Ռիզալ Բարք''-ի տարածքին եզրափակիչ սուրբ պատարագի արարողութեամբ, վերջ գտան ֆրանչիսկոս Քահանայապետին Սրի Լանքա եւ Ֆիլիփինեան կղզեխումբ կատարած` առաքելական միջազգային 7-րդ այցելութեան պաշտօնական ու հանրային հանդիպումները։
Մինչ Երկուշաբթի` 19 յունուար 2015-ի առաւօտեան ժամը 7,45-ին (Հռոմի ժամով 00,15-ին) Սրբազան Հայրը առաքելական նուիրակութեան մէջ մատուցեց սուրբ պատարագը ու ապա հրաժեշտ առաւ եւ ուղղուեցաւ` Մանիլայի 'Villamor Air Base'' օդակայան ուր 9,45-ին (Հռոմի ժամով 02,45-ին) տեղի ունեցաւ բարի երթի պաշտօնական արարողութիւնը` ներկայութեամբ Ֆիլիփինեան կղզեխումբի նախագահին ու այլ քաղաքական անձնաւորութիւններուն ինչպէս նաեւ բազմահազար Ֆիլիփինցիներուն որոնք այս օրերուն մեծ խանդավառութեամբ ընկերացան Սրբազան Քահանայապետին որ իրենց հետ կիսեց ուրախութեան եւ յուզմունքի պահեր։
Տեղական ժամով 10-ին (Հռոմի ժամով 3-ին), Ֆիլիփինեան դրօշակ կրող Քահանայապետական օդանաւը թռիչք առաւ եւ ուղղուեցաւ դէպի Հռոմ ուր նախատեսուած է ժամանումը ժամը 17,40-ին (Հռոմի ժամով), 14 ժամ 10 վայրկեան տեւող ճամբորդութեան աւարտին որուն ընթացքին օդանաւը կը սաւառնի 11 երկիրներու օդային տարածքին վրայ` Ֆիլիփինեան կղզեխումբ, Չինաստան, Մոնկոլիա, Ռուսաստան, Պիէլորուսիա, Լեհաստան, Զեխ հանրապետութիւն, Սլովաքիա, Աւստրիա, Սլովենիա եւ Իտալիա։
Սրի Լանքա եւ Ֆիլիփինեան կղզեխումբ կատարուած այս հովուական այցելութիւնը հանդիսացաւ ժամանակակից շրջանի իտալիայէն դուրս կատարուած Քահանայապետական միջազգային 144 ճամբորդութիւնը։